ಪಿಯಾವ್, ಟೊಮೆಟೊ ಆನಿ ಬಟಾಟೆ
Last Updated on Sunday, 20 December 2009 17:13 Written by ಸಿಜ್ಯೆಸ್, ತಾಕೊಡೆ/ ಖತಾರ್ Saturday, 19 December 2009 00:00
ಸುಳ್ಸುಳೆ ... ಸಿಜ್ಯೆಸ್, ತಾಕೊಡೆ
ಉದೆಂತಿಚೆ ತೇಗ್ ರಾಯ್ ಜೆಜು ಬಾಳ್ಕಾಚಿ ಭೆಟ್ ಕರುಂಕ್ ವೆತಾನಾ ಮೀರ್, ಧುಂಪ್ ಆನಿ ರಗ್ತಾಬಳ್ ತಸಲ್ಯೊ ಮೊಲಾದಿಕ್ ವಸ್ತು ವ್ಹರುನ್ ಗೆಲ್ಲೆ. ಆಜ್ ಉದೆಂತಿಚ್ಯಾ ರೊಮಾ ಶಹರಾ ಥಾವ್ನ್ ವಾ ಮಂಗಳಾಪುರಾ ಥಾವ್ನ್ ತೇಗ್ ಸಾದ್ಯಾ ಮನ್ಶಾಂಕ್ ವಿಂಚುನ್ ಜೆಜು ಬಾಳ್ಕಾಕ್ ಮೊಲಾದಿಕ್ ಕಾಣಿಕೊ ಭೆಟವ್ನ್ ನಮಾನ್ ಕರುನ್ ಯೆಯಾ ಮ್ಹಣ್ ಧಾಡ್ಲೆಂ ತರ್ ಕಿತೆಂ ಜಾಯ್ತ್?
ಜಾಂವ್ಚೆಂ ಕಾಂಯ್ ನಾ. ಆಮ್ಚೆ ತೇಗ್ ಸಾದೆ, ಭೊಳೆ ಆನಿ ಖಾಲ್ತ್ಯಾ ಕಾಳ್ಜಾಚೆ ಮನಿಸ್ ಜೆಜು ಬಾಳ್ಕಾಕ್ ಭೆಟಂವ್ಚ್ಯಾಕ್ ಏಕ್ ಕಿಲೊ ಪಿಯಾವ್, ಏಕ್ ಕಿಲೊ ಟೊಮೆಟೊ ಆನಿ ಏಕ್ ಕಿಲೊ ಬಟಾಟೆ ವ್ಹರುನ್ ವೆತಿತ್. ಕಾರಣ್ - ಆಯ್ಚ್ಯಾ ಕಾಳಾರ್ ಸಾದ್ಯಾ ಮನ್ಶ್ಯಾಂಕ್ ಹ್ಯೊಚ್ ಮೊಲಾದಿಕ್ ವ್ಹಸ್ತು.
ಮ್ಹಜ್ಯಾ ಭುರ್ಗ್ಯಾಪಣಾರ್ ಕಾರ್ಕೊಳ್ ಫೆಸ್ತಾಂತ್ ಎಕಾ ಆಣ್ಯಾಕ್ ಪಯ್ಲ್ಯಾ ಕುಮ್ಗಾರಾಚ್ಯಾ ಭುರ್ಗ್ಯಾಚ್ಯಾ ಕೊಪೆಲಾತೆದಿ ವ್ಹಡ್ ಚಾಕ್ಲಿ ಮೆಳ್ತಾಲಿ. ತ್ಯೆ ಚಾಕ್ಲೆಚ್ಯಾ ಬುರಾಂತ್ಲ್ಯಾನ್ ಮ್ಹಜೊ ಹಾತ್ ಪಾಶಾರ್ ಜಾತಾಲೊ. ಆಜ್ ಚಾಕ್ಲ್ಯೊ ವಿವಿಧ್ ಗಾತ್ರಾಂನಿ ಯೆತಾತ್. ಸಣ್ಣ ಕರಡಿ, ಹದಾ ಕರಡಿ ಆನಿ ದೊಡ್ಡ ಕರಡಿ ಮ್ಹಣ್ಚೆಪರಿ ಧಾಕ್ಟ್ಯೊ ಚಾಕ್ಲ್ಯೊ, ಹಳ್ತಾಚ್ಯೊ ಚಾಕ್ಲ್ಯೊ ಆನಿ ವ್ಹಡ್ಲ್ಯೊ ಚಾಕ್ಲ್ಯೊ ಮೆಳ್ತಾತ್. ಕಾರ್ಕೊಳ್ಚ್ಯಾ ಫಾಮಾದ್ ಚಾಕ್ಲೆಂಚಿ ಪ್ರಸ್ತುತ್ ಮಾರ್ಕೆಟ್ ದರ್ ನೆಣಾಂ. ಪುಣ್ ಉಣ್ಯಾರ್ ಪಾಂಚ್ ರುಪಯ್ ಪುಣಿ ಆಸ್ತಿತ್. ಆನಿ ಹ್ಯೆ ಚಾಕ್ಲೆಚ್ಯಾ ದೊಂಪ್ಳ್ಯಾಂತ್ಲ್ಯಾನ್ ಮ್ಹಜೆಂ ಬೋಟ್ಯಿ ರಿಗಾನಾ.
ಆದಿಂ ರುಪ್ಯಾಕ್ ಧಾ ಬಾಂಗ್ಡೆ ಮೆಳ್ತಾಲೆ ಜಾಲ್ಯಾರ್ ಹ್ಯಾ ದಿಸಾಂನಿ ವೀಸ್ ರುಪ್ಯಾಂಕ್ ಏಕ್ ಬಾಂಗ್ಡೊ. ಆದಿಂ ಆಮಿ ಎಕೆಕ್ಲೊ ಎಕೇಕ್ ಬಾಂಗ್ಡೊ ಖಾತಾಲ್ಯಾಂವ್. ಆತಾಂ ಘರಾಂನಿ ಮೋಗ್ ಆನಿ ಮಯ್ಪಾಸ್ ವಾಡ್ಲಾ ಜಾಲ್ಲ್ಯಾನ್ ಆಮಿಂ ತೆಗಾಂ ವಾ ಚವ್ಗಾಂ ಏಕ್ ಬಾಂಗ್ಡೊ ವಾಂಟುನ್ ಖಾತಾಂವ್.
ಆದಿಂ ಕುಜ್ನಾಂತ್ ಬೊಟ್ಲೆರಾಮ್ ವಾ ರಾಂದ್ಪಾಕುಡಾಂತ್ ಸೆರ್ಪಿನ್ಬಾಯ್, ಕಾರ್ಮಿಣ್ ಬಾಯ್, ಜುವಾನ್ ಬಾಯ್ ಆನಿ ಹೆರಾಂ ಪಿಯಾವ್ ಶಿಂದ್ತಾನಾ ಮಾವ್ನ್ಪಣಿಂ ದುಕಾಂ ಗಳಯ್ತಾಲಿಂ. ಆಜ್ ಇಜ್ಜಾಮ್, ಬಜ್ಜಾಮ್, ಮೊನ್ನಾಮ್ ಆನಿ ಬೊನಾಮ್ ಪಿಯಾವ್ ಹಾಡುಂಕ್ ಆಂಗ್ಡಿ ವೆತಾನಾ ದುಕಾಂ ಗಳಯ್ತಾತ್. ಟೊಮೆಟೊ ಆನಿ ಬಟಾಟೆ ಲೊಕಾಕ್ ಪಳೆವ್ನ್ ಹೆಡಾಯ್ತಾತ್.
ಸುಕ್ಯಾ ಮಾಸ್ಳೆಚಿ ಗಜಾಲ್ ಸಾಂಗ್ಚಿನಾಕಾ. ಆದಿಂ ಸಗ್ಳೊ ತಾಟೊ ಹಾಡ್ನ್ ದವರ್ಲ್ಯಾರ್ ಹ್ಯಾ ದಿಸಾಂನಿ ಶೆಂಬರ್ ವಾ ದೊನ್ಶಿ ಗ್ರಾಮ್ ಹಾಡಿಜೆ ಪಡ್ತಾ. ಆಮಿ ಏಕ್ ಉಪಾವ್ ಕೆಲಾ. ಆಮಿ ಸಕಾಳಿಂಚಿ ಪೇಜ್ ಜೇಂವ್ಕ್ ಬಸ್ತಾನಾ ತಾಟ್ಯಾಚೊ ವಾ ಯೆರ್ಲಿ, ಲೇಪ್ ವಾ ಕಾಂಪ್ ಭಾಜುನ್ ಸುತಾರ್ ಉಮ್ಕಾಳಾಂವ್ಚಿ ಆನಿ ಪರ್ಮಳ್ ಘೆವ್ನ್ ಪೇಜ್ ಜೆಂವ್ಚಿ.
ವರ್ಸಾಂ ಆದಿಂ ಪರ್ಯಾಂತ್ ನತಾಲಾಂ ಫೆಸ್ತಾಚ್ಯಾ ಸಂದರ್ಭಾರ್ ಕುಸ್ವಾರಾಚ್ಯೊ ಬೊಶಿಯೊ ಅದಲ್-ಬದಲ್ ಜಾತಾಲ್ಯೊ. ಶೆಜ್ಸಾಮಾರಾ, ಲಾಗ್ಶಿಲ್ಯಾ ಇಶ್ಟಾಂಗೆರ್, ಸಯ್ರ್ಯಾಂಗೆರ್ ಸಯ್ತ್ ಥರಾವಳ್ ಕುಸ್ವಾರ್ ಘೆವ್ನ್ ಹ್ಯೊ ಬೊಶಿಯೊ ಭಂವ್ತಾಲ್ಯೊ, ಘುಂವ್ತಾಲ್ಯೊ ಆನಿ ಧಾಂವ್ತಾಲ್ಯೊ. ಘರಾ ಘರಾಂನಿ ಲ್ಹಾನ್ ವ್ಹಡ್ ಡಬ್ಬ್ಯಾಂನಿ ಕುಸ್ವಾರಾಚಿ ರಾಸ್ಚ್ ರಾಸ್. ಎಲ್ಲುಬಾಯೆಚೊ ಕುಸ್ವಾರ್ ಆಲ್ಲಿಬಾಯೆಗೆರ್ ಆನಿ ಎಸ್ತುಬಾಯೆಚೊ ಕುಸ್ವಾರ್ ಬೊಸ್ತು ಮಾಮಾಗೆರ್ ಪಾವ್ತಾಲೊ.
ಆಜ್ ಎಲ್ಲುಬಾಯ್, ಆಲ್ಲಿಬಾಯ್, ಎಸ್ತುಬಾಯ್, ಬೊಸ್ತುಮಾಮ್ ಕಂಗಾಲ್ ಜಾಲ್ಯಾಂತ್. ತೊಂದಾಂ ಚಿರ್ಮುಟೊಂಕ್ ಘಾಲ್ಲ್ಯಾ ಆಂಬಾಡ್ಯೆಭಾಶೆನ್ ಬಾವ್ಲ್ಯಾಂತ್. ಅಲೆಸಾಮಾಚೊ ಆಣ್ಸಾಸೊರೊಯಿ ನಾ, ಕಾಲೆಸ್ತಾಮಾಚೊ ಕಾಜ್ಚೊ ಸೊರೊಯಿ ನಾ. ಸಗ್ಳ್ಯಾನಿತ್ಲ್ಯಾನ್ ಸರ್ಕಾರಿ ಇಸ್ಪಿರಿತ್. ಆಯ್ಚೊ ಮನಿಸ್ ಸಂತೊಸ್ ಜಾಲ್ಯಾರಿಯಿ ಸೊರೊ ಪಿಯೆತಾ, ಬೆಜಾರಾಯ್ ಭೊಗ್ಲ್ಯಾರ್ಯಿ ಸೊರೊ ಘೊಟ್ತಾ. ಪೆನ್ಶನ್ವಾಲ್ಯಾಕ್ಯಿ ಸೊರೊ, ಟೆನ್ಶನ್ವಾಲ್ಯಾಕ್ಯಿ ಸೊರೊ.
ಆಮ್ಚೊ ಗಾಂವ್ ದುದಾ-ಮ್ಹೊಂವಾನ್ ವ್ಹಾಳ್ಚೊ ಮ್ಹಳ್ಳೊ ಗಾಂವ್. ಹ್ಯಾ ಮ್ಹಜ್ಯಾ ಸೊಬಿತ್ ಸುಂದರ್ ಗಾಂವಾಂತ್ ಏಕ್ ಲೀಟರ್ ನಂದಿನಿ ದುದಾಕ್ ಬಾರಾ ರುಪಯ್ ಜಾಲ್ಯಾರ್ ಏಕ್ ಲೀಟರ್ ಬಿಸ್ಲೆರಿ ಮಿನರಲ್ ಉದ್ಕಾಕ್ ತೆರಾ ರುಪಯ್. ಹ್ಯಾ ಗಾಂವಾಂತ್ ಜಲ್ಮಾಲ್ಲೆ ಮನಿಸ್ ಭಾಗಿ, ಕಿತ್ಯಾಕ್ ಹಾಂಗಾಸರ್ ಉದ್ಕಾಪ್ರಾಸ್ ದೂದ್ ಸವಾಯ್. ಮನ್ಶಾನ್ ತಾನ್ ಲಾಗ್ಲ್ಲ್ಯಾ ವೆಳಾರ್ ಉದ್ಕಾ ಬದ್ಲಾಕ್ ದೂದ್ ಪಿಯೆವ್ಯೆತ್.
ಆದಿಂ ನಿತಳ್ ವಾರೆಂ ಪುಣಿ ಸೆಂವ್ಕ್ ಮೆಳ್ತಾಲೆಂ. ಆತಾಂ ತೆಂಯೆ ವಿಕಾಳ್ ಜಾಲಾಂ. ಮೂಸ್, ಜಳಾರಿ ಭರೊನ್ ಗೆಲ್ಯಾತ್. ಆಸ್ಪತ್ರೆಂನಿ ದಿಸಾಕ್ ಫಾಯ್ಲೆರಿಯಾ, ಮಲೇರಿಯಾ ವಾ ಗನೋರಿಯಾ ಪಿಡೆಸ್ತ್ ಪಳೆಂವ್ಕ್ ಮೆಳ್ತಾತ್ ತರ್ ರಾತಿಕ್ ಲವೇರಿಯಾ ಪಿಡೆನ್ ವಳ್ವಳ್ಚಿಂ ತರ್ನ್ಯಾ ಪ್ರಾಯೆಚಿಂ ಪಿಡೆಸ್ತಾಂ ಪಳೆಂವ್ಕ್ ಮೆಳ್ತಾತ್.
ಆಮ್ಚೆಂ ಭಾರತ್ ಮಹಾನ್. ಹ್ಯಾ ಮಹಾನ್ ಭಾರತಾಂತ್ ಲಲ್ಲೂ ಪ್ರಸಾದ್ ಯಾದವ್, ಜಯ ಲಲಿತಾ, ಮಾಯಾವತಿ, ಮಮತಾ ಬ್ಯಾನರ್ಜಿ ತಸಲಿಂ ಮಹಾನ್ ನಾಯಕ್, ನಾಯಕಿಂ ಆಸಾತ್. ಮನ್ಶ್ಯಾಂಚೆಂ ಕಶೆಂಯಿ ಲುಟುನ್ ಖಾತಾತ್, ಗೊರ್ವಾಂಚೆಂ ಖಾಣ್ಯಿ ಚೊರ್ನ್ ಖಾತಾತ್ ಮ್ಹಳ್ಯಾರ್?
ಅಸಲ್ಯೆ ಹ್ಯೆ ಪರಿಗತೆಂತ್ ಹ್ಯಾ ವರ್ಸಾಚೆಂ ಕ್ರಿಸ್ಮಸ್ ಕಶೆಂ ಜಾಯ್ತ್? ಹೆಪ್ಪಿ ಕ್ರಿಸ್ಮಸ್ ಜಾಂವ್ಚೆ ಥಂಯ್ ಕುಪ್ಪಿ ಕ್ರಿಸ್ಮಸ್ ಜಾಯ್ತ್ ವಾ ಫಕತ್ ಚಾಪ್ಪೆ ಕ್ರಿಸ್ಮಸ್ ಜಾಯ್ತ್? ಆದ್ಲ್ಯಾ ಕ್ರಿಸ್ಮಸಾಕ್ ಲೋಕ್ ಕುಸ್ವಾರಾವಿಶಿಂ ಉಲಯ್ತಾಲೊ. ಕೇಕ್, ನೆವ್ರ್ಯೋ, ಕೊಕ್ಕಿಸಾಂ, ಗುಳಿಯೊ, ಪಾತೆಕಾಂ, ಲಾಡು ಇತ್ಯಾದಿಂಚಿಂ ಮೊಲಾಂ ವಿಚಾರ್ತಾಲೊ. ಹ್ಯಾ ವರ್ಸಾ ಲೋಕ್ ವಿಚಾರ್ತಾ , ಪಿಯಾವಾಕ್ ದೆಂವ್ಲಾಂಗೀ, ಚಡ್ಲಾಂ? ಟೊಮೆಟೊಂಕ್ ಕಶೆಂ? ಬಟಾಟ್ಯಾಂಕ್ ಕಿತ್ಲೆ?
ಎದೊಳ್ ಆಮಿ ಜೆಜು ಬಾಳ್ಕಾಕ್ ’ಜಯ್ ಜಯ್’ ಮ್ಹಣ್ತಾಲ್ಯಾಂವ್.
ಹ್ಯಾ ವರ್ಸಾ "ಹಾಯ್ ಹಾಯ್’ ಮ್ಹಣಾಜೆ ಪಡ್ತಾಮೂ?
Comments
CGS...you are Mr.Bean of Konkani....
Your article is not only humorous...it something like "Katta Mitta"..