ಅರ್ದ್ಯಾ ವೊರಾಚೊ ಮೊಗಾ-ಖೆಳ್
Last Updated on Wednesday, 23 December 2009 15:53 Written by Naveen Kurmbil Saturday, 19 December 2009 00:00
ನವೀನ್ ಕುಂರ್ಬಿಲ್ ಕಿನ್ನಿಗೋಳಿ ಚೊ ಮಟ್ವ್ಯಾ ಕಾಣ್ಯಾಂಚೊ ನಾಂವಾಡ್ದಿಕ್ ಬರಯ್ಣಾರ್ ಯಾ ರಾಯ್. ಏದೊಳ್ಚ್ 75 ಪ್ರಾಸ್ ಚಡ್ ಮಟ್ವ್ಯೊ ಕಾಣ್ಯೊ ತಾಣೆ ಬರಯ್ಲ್ಯಾತ್. ಕಾಣಿಕ್ ಪತ್ರಾಚ್ಯಾ ಮಟ್ವ್ಯೊ ಕಾಣ್ಯೊ ಸ್ಪರ್ದ್ಯಾಂತ್ ರುಪಯ್ 10,000 ಇನಾಮ್ ತಾಣೆಂ ಜಿಕ್ಲಾಂ ಮಾತ್ರ್ ನಹಿಂ ಸಬಾರ್ ಹೆರ್ ಸ್ಪರ್ದ್ಯಾಂನಿಂ ತಾಣೆಂ ಇನಾಮಾಂ ಜಿಕ್ಲ್ಯಾಂತ್. ತಾಚ್ಯೊ ಸಬಾರ್ ಕನ್ನಡ ಮಟ್ವ್ಯೊ ಕಾಣ್ಯೊ ನಾಂವಾಡ್ದಿಕ್ ಕನ್ನಡ ಪತ್ರಾಂನಿ ಎದೊಳ್ಚ್ ಪ್ರಸಾರ್ ಜಾಲ್ಯಾತ್. ಹೊ ದಿವಂಗತ್ ಮೋವಿನ್ ಡಿ ಸೊಜಾಚೊ ಧಾಕ್ಟೊ ಭಾವ್.
¯ÉÃRPï - £À«Ã£ï PÀÄA©ð¯ï.
ಚೊವಿಸ್ ವರ್ಸಾಂಚ್ಯಾ ತರ್ನಾಟ್ಪಣಾಚ್ಯಾ ರಂಗಾಳ್ ಸೊಬಾಯೆನ್ ಫುಲೊನ್ ರಾವ್ಲ್ಲಿ ಕ್ಯಾಲಿಕಟ್-ಕೇರಳಾಚಿ ಚಲಿ ಮೆರಿ, ಅಬುಧಾಬಿ ಆರ್ಥಿಕ್ ಅನ್ಕೂಲ್ವಂತ್ ಮಂಗ್ಳುರಿ ಕ್ರಿಸ್ತಾಂವ್ ಕುಟ್ಮಾಗೆರ್ ಘರ್ ಕಾಮಾಕ್ ರಾವೊನ್ ಸಾತ್ ಮಹಿನೆ ಪಾಶಾರ್ ಜಾಲ್ಲೆ. ಕುಟಾಮ್ ಮ್ಹುಳ್ಯಾರ್ ವ್ಹಡ್ ಹುದ್ದ್ಯಾಚ್ಯಾ ಕಾಮಾಕ್ ವೆಚಿಂ ಪತಿ ಆನಿ ಪತಿಣ್, ತಾಂಕಾಂ ಚಾರ್ ಆನಿ ಸ ವರ್ಸಾಂ ಪ್ರಾಯೆಚಿಂ ದೊಗಾಂ ಚೆಡ್ವಾಂ ಭುರ್ಗಿಂ. ಚಾರ್ ಕುಡಾಂಚೆಂ ಜಯ್ತ್ ಘರ್. ಮನ್ಶಾಂ ದಯಾಳ್.
ಆಪ್ಣಾಚ್ಯಾ ಗಾಂವಾಥಾವ್ನ್ ಪಯ್ಶಿಲ್ಯಾ ಹ್ಯಾ ಗಾಂವಾಕ್ ಯೇವ್ನ್ ಪಾವ್ಲ್ಲ್ಯಾ ಮೆರಿಕ್ ಅಶೆಂಚ್ ಭಾಯ್ರ್ ಗೆಲ್ಲ್ಯಾ ತೆದ್ನಾಂ ತಾಚ್ಯಾಚ್ ಗಾಂವ್ಚೊ ಚಲೊ, ನಾಯರಾಚಿ ಅವ್ಚಿತ್ ಭೆಟ್ ಜಾವ್ನ್ ಎಕಾಮೆಕಾ ಒಳೊಕ್ ಜಾವ್ನ್ ಎಕ್ಸುರ್ಪಣಾಚ್ಯಾ ಬಾಂದ್ಪಾಸಾಂತ್ ಒಳೊಕ್ ಸವ್ಕಾಸ್ ಮೊಗಾರುಪಾಕ್ ಬದ್ಲಾಲ್ಲಿ. ಕೋಣ್ ತರ್ಯಿ ಆಪ್ಲ್ಯಾ ಗಾಂವ್ಚೊ ಭೆಟ್ಲಾ ನ್ಹಂಯ್ಗಿ ಮ್ಹಳ್ಳಿ ಭುಜಾವಣ್ ಮೆರಿಕ್.
ತಿಂ ದೊಗಾಂಯ್ ಭಾಯ್ರ್ ಕೆದ್ನಾಂಯ್ ಭೆಟ್ತಾಲಿಂ. ಏಕ್ ದೀಸ್ ಮೆರಿನ್ ನಾಯರಾಕ್ ಘರಾ ಯೆಂವ್ಕ್ ಆಪವ್ಣೆಂ ದಿಲೆಂ. ಹೆಂಚ್ ಆಶೆವ್ನ್ ಆಸ್ಲ್ಲ್ಯಾ ನಾಯರಾನ್ ತ್ಯಾ ಎಕಾ ದಿಸಾ ಮೊಗಾಚ್ಯಾ ವಿವಿದ್ ಚಿಂತ್ನಾನಿ, ವಿವಿದ್ ಸಪ್ಣಾಂನಿ ಕುಡಿಮನಾಚ್ಯಾ ಉಲ್ಲಾಸಾನ್ ತಿಸ್ರೆ ಮಾಳ್ಯೆಚೆರ್ ಆಸ್ಚ್ಯಾ ಘರಾಚಿ "ಆಪವ್ಣೆ ಕಾಂಪಿಣ್" ದಾಂಬ್ಲಿ. ಆಕರ್ಶಕ್ ವ್ಯಕ್ತಿತ್ವಚ್ಯಾ ನಾಯರಾಕ್ ಬಾಗ್ಲಾದಾರ್ವಂತಾರ್ ಉಬೊ ರಾವ್ಲ್ಲೆಂ ಪಳಯಿಲ್ಲೆಂಚ್ ಮೆರಿಚೊ ಮೋವ್ ಜೀವ್ ಭರೊನ್ ಆನಿ ಫುಲೊನ್ ಆಯ್ಲೊ.
ವೊರಾಂ ಸಾಂಜೆಚಿಂ ಪಾಂಚ್. ಧನಿನ್ ಘರಾ ಪಾವ್ತಾನಾ ರಾತಿಚಿಂ ಸಾಡೆ-ಆಟ್ ಜಾತಾತ್. ಘರಾ ನೆಣ್ತಿಂ ಭುರ್ಗಿಂ ಮಾತ್. ಭರ್ಪೂರ್ ವೇಳ್ ಹಾತಿಂ ಆಸಾ. ತರ್ನ್ಯಾ ಮೋಗ್-ಕರ್ನಾರಾಂಚ್ಯಾ ಅರ್ದ್ಯಾ ವೊರಾಚ್ಯಾ ಮೊಗಾ ಖೆಳಾಕ್ ಕಸಲೊಯಿ ವಾ ಕೊಣಾಯ್ ಥಾವ್ನ್ ಬಾದಕ್ ಯೆಂವ್ಚೆಂ ನಾ. ಮೆರಿನ್ ಆಮ್ಸೊರಾನ್ ಭುರ್ಗ್ಯಾಂಚಿ ಬಂದಬಸ್ತ್ ಕೆಲಿ.
ದೊಗಾಂಯಿ ಸಾಂಗಾತಾ ಧನ್ಯಾಚ್ಯಾ ನಿದ್ಚ್ಯಾ ಕುಡಾಕ್ ರಿಗ್ಲಿಂ ಆನಿಂ ದಾರಾಚಿ ಖಿಳ್ ಘಾಲಿ. "ಆಡಿಯೊ" ಚಾಲು ದವರ್ಲೊ. ಮಾದಕ್ ಪದಾಂ ವ್ಹಾಜೊಂಕ್ ಲಾಗ್ಲಿಂ. ಮಜ್ಬೂತ್ ಖಟ್ಲ್ಯಾರ್ ಮೊಗಾಉಲೊಣೆಂ ಹಾಸೊ-ಖೆಳ್ ಸುರು ಜಾಲೊ. ಹ್ಯಾ ಸಾಂಗಾತಾಂತ್ ಮನಾಂಚೊ ಎಕ್ವಟ್, ಎಕಾಮೆಕಾ ಕುಡಿಚೊ ಸ್ಪರ್ಶಾನ್ಬೊಗ್! ಭರ್ಪೂರ್ ವೆಳಾ ಅವ್ಕಾಸ್ ಆಸಾ ತರ್ಯಿ "ಸೊಬಾಯ್" ಸಾಂಗಾತಾ ಆಸ್ತಾನಾ ಗಳಾಯ್ ಕಿತ್ಯಾಕ್? ನಾಯರಾನ್ ಸವ್ಕಾಸ್ ಮೆರಿಕ್ ಲಾಗಿಂ ವೊಡುನ್ ಗಳ್ಯಾಭೊಂವಾರಿಂ ಹಾತ್ ಭೊಂವ್ಡಾಯ್ಲೊ. ಮೆರಿನ್ ಸಂಪೂರ್ಣ್ ಸಹಕಾರ್ ದಿಲೊ. ಮಾಗಿರ್...?
ಮೊಗಾಚ್ಯಾ ಸೊನಿಯಾ,
ತುಮಿ ಸಕ್ಕಡ್ ಬರೆ ಭಲಾಯ್ಕೆಂತ್ ಆಸ್ತೆಲ್ಯಾತ್ ಮ್ಹುಣ್ ಪಾತ್ಯೆತಾಂ. ಆಮಿಂ ಬರಿಂ ಆಸಾಂವ್. ಪುಣ್ ಭುರ್ಗಿಂ ದೊಗಾಂಯ್ ಆಜೂನ್ಯಿ ದಯ್ಹಿಕ್ ತಶೆಂ ಮಾನಸಿಕ್ ಥರಾನ್ ಕಶ್ಟೊನ್ ಆಸಾತ್. ಪ್ರಮುಖ್ ಜಾವ್ನ್ ನಿಮಾಣೆಂ. ತ್ಯಾ ದೀಸ್ ಕಿತೆಂ ಘಡ್ಲ್ಲೆಂ ಮ್ಹುಳ್ಳೆವಿಶಿಂ ಹಾಂಗಾಸರ್ ವಿಸ್ತಾರಾಯೆನ್ ಬರಯ್ತಾಂ. ಸತ್ ಸಾಂಗ್ಚೆಂ ತರ್ ತ್ಯಾ ಅನ್ವಾರಾಚೊ ಧಕೊ ಆಜೂನ್ಯಿ ಆಮ್ಚೆಥಾವ್ನ್ ಪಯ್ಸ್ ಜಾಂವ್ಕ್ ನಾ.
ತ್ಯಾ ಘಡಿತಾಚ್ಯಾ ದೋನ್ ಹಪ್ತ್ಯಾ’ದಿಂ ಮ್ಹುಜೊ ದಾವೊ ದೊಳೊ ನಿರಂತರ್ ಉಡೊನ್ ಪಡ್ತಾಲೊ. ಹಾಮ್ವ್ ಡೇವಿಡಾಕ್ ಸಾಂಗೊನ್ ಆಸ್ಲ್ಲಿಂಕಿ ಕಿತೆಂ ತರ್ಯಿ ವಾಯ್ಟ್ ಘಡೊಂಕ್ ಆಸಾ ಕೊಣ್ಣಾ? ಸಕ್ಕಡ್ ಸಾರ್ಕೆಂ ಆಸ್ತೆಲೆಂ ಮ್ಹುಣ್. ತೊ ಮ್ಹಾಕಾ ಭರ್ವಸೊ ದೀವ್ನ್ ಆಸ್ಲ್ಲೊ. ತ್ಯಾ ದೀಸ್ ಬುದ್ವಾರಾ ಕಾಮಾ ಥಾವ್ನ್ ಪಾಟಿಂ ರಾತಿಂ ಸಾಡೆ ಆಟ್ ವೊರಾಂಚೆರ್ ಟೆಕ್ಸಿಚೆರ್ ಪಯ್ಣ್ ಕರುನ್ ಆಸ್ತಾನಾ ಹಾಂವ್ ಭುರ್ಗ್ಯಾಂವಿಶಿಂ ಚಿಂತಾಲಿಂ ಆನಿ ಹಪ್ತ್ಯಾಚೆ ಅಕೆರಿಚೆ ದೀಸ್ ತಾಂಚೆಸಂಗಿಂ ಕಶೆ ಖರ್ಚುಂಚೆಗಿ ಮ್ಹಳ್ಳ್ಯಾ ಚಿಂತ್ನಾಂನಿ ಆಸ್ಲ್ಲಿಂ.
ಲಿಫ್ಟ್ ದುಸ್ರೆ ಮಾಳ್ಯೆಕ್ ಪಾವ್ತಾನಾ ಡಿಯಂಡ್ರಾನ್ ಜ್ಯೋರಾನ್ ರಡ್ಚೆಂ ಮ್ಹಾಕಾ ಆಯ್ಕತಾಲೆಂ. ಹಾಂವೆಂ ಚಿಂತ್ಲೆಂ ಕಿ ಹಾಂವ್ ಸಪ್ಣೆವ್ನ್ ಆಸಾಂ. ಘಡ್ಪಾಂ ಚಿಂತುನ್ ಆಸಾಂ ತಶೆಂ. ಪುಣ್ ಲಿಫ್ಟ್ ತಿಸ್ರೆ ಮಾಳ್ಯೆಕ್ ಪಾವ್ತಾನಾ ತಕ್ಶಣ್ ಮ್ಹಾಕಾ ಖಂಡಿತ್ ಭೊಗ್ಲೆಂಕಿ ಕಿತೆಂ ತರ್ಯಿ ವಾಯ್ಟ್ ಘಡ್ಲಾಂ. ದಾರಾಭಾಯ್ರ್ ರಾವೊನ್ ಹಾಂವ್ ಜ್ಯೊರಾನ್ ಉಲೊ ದೀಲಾಗ್ಲಿಂ. "ಮೇರಿ ದಾರ್ ಉಗ್ತೆಂ ಕರ್... ಮೇರಿ ದಾರ್.." ಪುಣ್ ಕಾಮಾಚೆ ಚಲ್ಯೆನ್ ದಾರ್ ಉಘಡುಂಕ್ ಪಾಂಚ್ ಮಿನುಟಾಂಚೊ ವೆಳಾವ್ಕಾಸ್ ಕಾಣ್ಗೆಲೊ. ತ್ಯಾ ಪರ್ಯಾಂತ್ ಮ್ಹಾಕಾ ಚೆಲ್ಸಿಯಾಚೆಂ ರಡ್ಣೆಂ ಆಯ್ಕಾನಾತ್ಲೆಂ. ಫಕತ್ ಡಿಯಂಡ್ರಾಚೆಂ ರಡ್ಣೆಂಮಾತ್. ಹಾಂವೆಂ ಚಿಂತ್ಲೆಂಕಿ ಚೆಲ್ಸಿಯಾ ಕಾಂಯ್ ಘರಾ ಭಿತರ್ ಕಸಲೆಂಯಿ ಅವ್ಗಡ್ ಘಡೊನ್ ಮೆಲಾಸ್ತೆಲೆಂ. ತ್ಯಾ ದೆಕುನ್ ಕಾಮಾಚಿ ಚಲಿ ದಾರ್ ಉಘಡ್ನಾ. ಕೆದ್ನಾಂ ತಾಣೆಂ ದಾರ್ ಉಗಡ್ಲೆಂಗಿ ತೆದ್ನಾಂ ಹಾಂವ್ ಸಗ್ಳಿಂಚ್ ಕಾಂಪೊನ್ ತಕ್ಲಿ ಘುಂವೊಳ್ ಯೇವ್ನ್ ಮತಿಹೀನ್ ಜಾಂವ್ಚೆ ಸ್ಥಿತೆಕ್ ಪಾವ್ಲ್ಲಿಂ. ಹಾಂವೆಂ ದೆಕ್ಲ್ಲೆಂ ತೆಂ ದ್ರಶ್ಯ್ ಮೊರ್ತಾಪರ್ಯಾಂತ್ ಮ್ಹಜೆ ಮತಿಂತ್ಲೆಂ ಪಯ್ಸ್ ವೆಚೆಂನಾ ತೆಂ ಖಂಡಿತ್.
ಮತಿಹೀನ್ ಜಾವ್ನ್ ಕಶ್ಟಾಂನಿ ಉಸ್ವಾಸ್ ಸೊಡ್ಚ್ಯಾ ಚೆಲ್ಸಿಯಾಕ್ ಮೇರಿನ್ ಆಪ್ಲ್ಯಾ ಹಾತಾಂನಿ ಧರ್ಲ್ಲೆಂ. ಚೆಲ್ಸಿಯಾ ಪೆಂಕ್ಟಾ ಸಕಯ್ಲ್ ರಗ್ತಾನ್ ಬುಡ್ಲ್ಲೆಂ. ರಗತ್ ಆನಿ ಕುಡಿಚೆಂ ಉದಾಕ್ ಥೆಂಬೆ ಥೆಂಬೆ ಜಾವ್ನ್ ಧರ್ಣಿಕ್ ಪಡ್ತಾಲೆಂ. ಪಾಂಯ್ ದೊನ್ಯಿ ಹುಲ್ಪೊನ್ ಮಾಸ್ ಭಾಯ್ರ್ ಆಯಿಲ್ಲೆಂ. ದಾವ್ಯಾ ಪಾಂಯಾಂಚೆಂ ನಿಮಾಣೆಂ ಬೋಟ್ ಕೆದ್ನಾಂ ಸಕ್ಲಾ ಪಡ್ತಾಗಿ ತಶೆಂ ಉಮ್ಕಾಳ್ತಾಲೆಂ. ಪಾಂಯಾಚಿ ಕಾತ್ ಪಾಂಯಾಬೊಟಾಕ್ ಉಮ್ಕಾಳ್ತಾಲಿ. ನಾಕ್ಶೊ ಭಾಯ್ರ್ ಆಯಿಲ್ಲ್ಯೊ. ಕೂಡ್ ಧವ್ಸಾಣೆಕ್ ಪಡ್ಲ್ಲಿ. ಪಾಂಚ್ ಮಿನುಟಾಂಭರ್ ಮ್ಹಜೆಥಾವ್ನ್ ಉಲೊಂಕ್ ಸಾದ್ಯ್ ಜಾಲೆಂನಾ. ತೋಂಡ್ ಉಗ್ತೆಂ ಕರ್ತಾಲಿಂ. ತರ್ಯಿ ಥಂಯ್ಸರ್ ಉತ್ರಾಂಚೊ ಆವಾಜ್ ನಾತ್ಲ್ಲೊ. ಉತ್ರಾಂಖಾತಿರ್ ಗಳೊ ಧರುನ್ ದಾಂಬ್ಲೊ ತರ್ಯಿ ಮ್ಹುಜೆವರ್ವಿಂ ಸಾದ್ಯ್ ಜಾಲೆಂನಾ.
ತ್ಯಾ ಪರ್ಯಾಂತ್ ಡಿಯೆಂಡ್ರಾ ಮ್ಹಜ್ಯಾ ಪಾಟ್ಲ್ಯಾಣ್ ಲಿಪೊನ್ ರಡ್ಣ್ಯಾಸವೆಂ ಪುಸ್ಪುಸ್ತಾಲೆಂ "ಮಾಮ್ಮಿ ಮ್ಹಾಕಾ ಮಾರಿನಾಕಾ... ಪ್ಲೀಸ್ ಮಾರಿನಾಕಾ...ಹುನ್ ಹುನ್ ಉದಾಕ್... ಚೆಲ್ಸಿಯಾ ಹುಲ್ಪತಾ..." ಥೊಡೊ ವೇಳ್ ಪರ್ಯಾಂತ್ ಮಾಕಾ ಕಿತೆಂ ಕರ್ಚೆಂ ಮ್ಹಣ್ ಕಳಿತ್ ಜಾಂವ್ಕ್ ನಾ. ಅಕೆರಿಕ್ ತರ್ಯಿ ಮ್ಹಜೆಥಾವ್ನ್ ತಾಳೊ ಭಾಯ್ರ್ ಪಡ್ಲೊ. ಹಾಂವ್ ಬೊಬಾಟ್ಲಿಂ- "ಮೇರಿ ಕಿತೆಂ ಜಾಲೆಂ?" ತೆಂ ಮ್ಹಣಾಲೆಂಕಿ ಚೆಲ್ಸಿಯಾನ್ ಹುನ್ ಉದ್ಕಾಚೆಂ ಆಯ್ದಾನ್ ಸಕ್ಲಾ ಘಾಲೆಂ. ಚೆಲ್ಸಿಯಾಚೆ ದೊನ್ಯಿ ಪಾಂಯ್ ತಾಂಬ್ಡೆ ಜಾವ್ನ್ ಸುಜೊನ್ ಆಯಿಲ್ಲೆ. ಉಜ್ಯಾ ಫೊಡ್ ಉದೆಲ್ಲೆ. ಡಿಯೆಂಡ್ರಾಚಿಂಯಿ ಪಾಂಯಾ ತಳಾಂ ಹುಲ್ಪಾಲ್ಲಿಂ. ತೆಂ ಮ್ಹಜೆ ಮುಸ್ತಾಯ್ಕೆಕ್ ಧರುನ್ "ಮಾಮ್ಮಿ, ಮ್ಹಾಕಾ ಉಕಲ್... ಮ್ಹಾಕಾ ಉಕಾಲ್, ಪಾಂಯ್ ಹುಲ್ಪಾತಾ" ಮ್ಹಣ್ ರಡ್ತಾಲೆಂ. ಮ್ಹಜಿ ಗಿನ್ಯಾನ್ ಮಾತ್ ಮತಿಹೀನ್ ಜಾಲ್ಲ್ಯಾ ಚೆಲ್ಸಿಯಾಚೆರ್ ಆಸ್ಲ್ಲಿ. ಹಾಂವೆಂ ಡೆವಿಡಾಕ್ ಫೊನ್ ಕೆಲೆಂ ತರ್ಯಿ ತಾಂಚ್ಯಾ ದಫ್ತರಾಚ್ಯಾ ಹಫ್ತ್ಯಾಚ್ಯಾ ಮಿಟಿಂಗಾಚೊ ದೀಸ್ ಜಾಲ್ಲ್ಯಾನ್ ಫೊನ್ ಕೊಣೇಂಯಿ ಉಕಲ್ಲೆಂನಾ.
ಚೆಲ್ಸಿಯಾಕ್ ಪರತ್ ಮೆರಿಚ್ಯ ಹಾತಾಂನಿ ದೀವ್ನ್ ಸಕ್ಲಾ ದೆಂವೊನ್ ಖಾಲಿ ಪಾಂಯಾಂನಿ ರಸ್ತ್ಯಾರ್ ಧಾಂವೊಂಕ್ ಲಾಗ್ಲಿಂ. ಪಿಶ್ಯಾಪರಿಂ ಬೊಬಾಟ್ ಮಾರುನ್ ರಡೊನ್ ಧಾಂವ್ತಾಲಿಂ. ತಿತ್ಲ್ಯಾರ್ ಏಕ್ ಕಾರ್ ಯೆಂವ್ಚೆಂ ಪಳೆವ್ನ್ ಹಾಂವೆಂ ರಾವಯ್ಲೆಂ. ತ್ಯಾ ದಾದ್ಲ್ಯಾಲಾಗಿಂ ಕೊಮೊಕ್ ಮಾಗ್ಲಿ. ಪುಣ್ ಹಾಂವ್ ಕಿತೆಂ ಉಲವ್ನ್ ಆಸಾಂ ಮ್ಹಳ್ಳೆಂ ತಾಕಾ ಸಮ್ಜೊಂಕ್ ನಾ. ಕಿತ್ಯಾಕ್ ಮ್ಹಳ್ಯಾರ್ ತಾಳ್ಯಾಂತ್ ಥಾವ್ನ್ ಉತ್ರಾಂ ಭಾಯ್ರ್ ಪಡಾನಾತ್ಲ್ಲಿಂ. ಹಾತ್ ಭಾಶೆನ್ ಮ್ಹಾಕಾ ಸಾಂಗೊಂಕ್ ಜಾಯ್ ಆಸ್ಲ್ಲೆಂ ಸಾಂಗೊಂಕ್ ಪ್ರೇತನ್ ಕರುನ್, "ಮ್ಹಜಿಂ ದೊಗಾಂಯಿ ಭುರ್ಗಿಂ ಮರೊನ್ ಆಸಾತ್ ಮ್ಹಾಕಾ ಕುಮಕ್ ಕರ್" ಮ್ಹಣ್ ಆಡ್ದೊಸ್ ಮಾಗ್ಲೊ. ಮ್ಹಜೆ ಸಾಂಗಾತಾ ತೊ ಘರಾ ಧಾಂವೊನ್ ಆಯ್ಲೊ. ಬಿರ್ಮೊತೆಚೊ ದಾದ್ಲೊ ಮ್ಹಾಕಾ ಕುಮೊಕ್ ಕರುಂಕ್ ಲೆಕಾವರ್ತೆಂ ಪ್ರೇತನ್ ಕರುನ್ ಆಸ್ಲ್ಲೊ. ತೊ ಮ್ಹಣಾಲೊ "ಎಕಾ ಭುರ್ಗ್ಯಾಕ್ ತುಂ ಘೆ, ಆನ್ಯೆಕ್ಲ್ಯಾಕ್ ಹಾಂವ್ ಕಾಣ್ಗೆತಾಂ. ಸೆಂಟ್ರಲ್ ಆಸ್ಪತ್ರೆಕ್ ವಚುಂಯಾಂ." ಹಾಂವೆಂ ’ನಾಕಾ’ ಮ್ಹಣ್ ಸಾಂಗ್ಲೆಂ. "ಪಯ್ಲೆಂ ಮ್ಹಾಕಾ ಎಕ್ಲ್ಯಾಕ್ ಮ್ಹಜ್ಯಾ ಘೊವಾಚ್ಯಾ ದಫ್ತರಾಕ್ ಪಾವಯ್ ಪ್ಲೀಸ್..."
ತಾಣೆಂ ಮ್ಹಾಕಾ ಡೆವಿಡಾಚ್ಯಾ ದಫ್ತರಾಕ್ ಪಾವಯ್ಲೆಂ. ಆಪುಣ್ ಭಾಯ್ರ್ ರಾಕ್ತಾಂ. ವೆಗಿಂ ವಚೊನ್ ತುಜ್ಯಾ ಘೊವಾಕ್ ಆಪವ್ನ್ ಹಾಡ್ ಮ್ಹಣಾಲೊ. ಚೊವ್ತೆ ಮಾಳ್ಯೆಚ್ಯಾ ಡೆವಿಡಾಚ್ಯಾ ದಫ್ತರಾಕ್ ಪಾವ್ಲಿಂ. ಪೂಣ್ ದಾರ್ ಧಾಂಪ್ಲ್ಲೆಂ. ಉಗ್ತೆಂ ಕರುಂಕ್ ಪ್ರೇತನ್ ಕೆಲೆಂ..ಬಡಯ್ಲೆಂ. ಪೂಣ್ ದಾರ್ ಕೊಣೆಂಯೀ ಉಗ್ತೆಂ ಕೆಲೆಂನಾ. ಭಾಯ್ರ್ ಆಸ್ಲ್ಲ್ಯಾಂನಿ ಕಿತೆಂ ಜಾಲೆಂ ಮ್ಹಣ್ ವಿಚಾರ್ಲೆಂ ತರ್ಯಿ ಸಾಂಗ್ಚೆ ಪರಿಗತೆರ್ ನಾತ್ಲ್ಲಿಂ. ಪಾಟ್ಲ್ಯಾ ದಾರಾಕುಶಿಂ ಧಾಂವ್ಲಿಂ ಆನಿ ದಾರ್ ಲೊಟ್ಲೆಂ. ಸಕ್ಕಡ್ ಮಿಟಿಂಗಾಂತ್ ವೆಸ್ತ್ ಜಾವ್ನಾಸ್ಲ್ಲಿಂ. ಡೆವಿಡ್... ಡೆವಿಡ್..." ಹಾಂವ್ ಬೊಬಾಟ್ಲಿಂ. ಬಸೊನ್ ಆಸ್ಲ್ಲಿಂ ಸಕ್ಕಡ್ ಉಬಿಂ ರಾವ್ಲಿಂ. ಡೆವಿಡ್.. ಮೆರಿನ್ ದೊಗಾಂಯಿ ಭುರ್ಗ್ಯಾಂಕ್ ಹುಲ್ಪವ್ನ್ ಘಾಲಾಂ..."
ಸಕ್ಡಾಂ ಆಮ್ಚೆ ಸಾಂಗಾತಾ ಸಕ್ಲಾ ಧಾಂವೊನ್ ಆಯ್ಲಿಂ. ಹಾಂವ್ ಆನಿಂ ಡೆವಿಡ್ ಅಮೆರಿಕಾಗಾರಾಚ್ಯಾ ಕಾರಾರ್ಚ್ ಆಯ್ಲ್ಯಾಂವ್. ಘರಾಲಾಗಿಂ ಕಾಂಯ್ ಶೆಂಬೊರ್ ಲೋಕ್ ಜಮೊ ಜಾಲ್ಲೊ. ಎಕ್ಲ್ಯಾನ್ ಡಿಯೆಂಡ್ರಾಕ್ ಆನಿ ಹಾಂವೆಂ ಚೆಲ್ಸಿಯಾಕ್ ಉಕಲ್ಲೆಂ. ಜಮೊ ಆಸ್ಲ್ಲ್ಯಾಂ ಪಯ್ಕಿಂ ಥೊಡ್ಯಾಂನಿ ಚೆಲ್ಸಿಯಾಕ್ ಪಳಯಿಲ್ಲೆಂಚ್ ಭಿಂಯಾನ್ ಕಿಂಕ್ರಾಟ್ ಮಾರ್ಲಿ. ತೆಂ ವಸ್ತುರಾವಿಣೆ ಆಸ್ಲ್ಲೆಂ ಆನಿ ರಗ್ತಾನ್ ಬುಡ್ಲ್ಲೆಂ. ಡೆವಿಡ್ ಸರ್ವ್ ಹೊಗ್ಡಾವ್ನ್ ಘೆತ್ಲ್ಲೆಪರಿಂ ತಕ್ಲೆಕ್ ಹಾತ್ ಧರುನ್ ಘರಾಚ್ ಉರ್ಲೊ. ತಾಚ್ಯಾ ಧನ್ಯಾಚ್ಯಾ ಕಾರಾರ್ ಆಮಿ ಉಜ್ಯಾ ಘಾಯಾಂಚೆ ಚಿಕಿತ್ಸೆಕ್ ಪ್ರಖ್ಯಾತ್ ಜಾವ್ನಾಸ್ಚೆ ಆಸ್ಪತ್ರೆಕ್ ಪಾವ್ಲ್ಯಾಂವ್.
ಆಸ್ಪತ್ರೆಕ್ ಪಾವ್ಲ್ಲೆಂಚ್ ನರ್ಸಾಂನಿ ಚೆಲ್ಸಿಯಾಕ್ ಬರ್ಫಾಚ್ಯಾ ಉದ್ಕಾಂತ್ ಬುಡಯ್ಲೆಂ. ತೆದೊಳ್ಪರ್ಯಾಂತ್ ಹಾಂವೆಂ ಮೆಲಾಂ ಕೊಣ್ಣಾ ಮ್ಹಣ್ ಚಿಂತ್ಲ್ಲೆಂ ಭುರ್ಗೆಂ ರಡೊಂಕ್ ಲಾಗ್ಲೆಂ. ಚೆಲ್ಸಿಯಾಕ್ ಬರ್ಫಾ ಉದ್ಕಾಂತ್ ಬುಡಯ್ತಾನಾ ಡಿಯಂಡ್ರಾನ್ ಪಳಯಿಲ್ಲೆಂ. ತೆಂ ರಡೊನ್ ಸಾಂಗ್ತಾಲೆಂ..."ಮಾಮ್ಮಿ..ಚೆಲ್ಸಿಯಾಕ್ ಆಪಡ್ನಾಕಾತ್... ಘಾಯ್... ಹುನ್ ಹುನ್ ಉದಾಕ್..." ಚೆಲ್ಸಿಯಾಕ್ ಒಪ್ರೇಶನ್ ಮೆಜರ್ ನಿದಾಯಿಲ್ಲೆಂ ಪಳೆವ್ನ್ ಡಿಯೆಂಡ್ರಾಚ್ಯಾ ದೊಳ್ಯಾ ಖಾಂಚಿಂನಿ ಭರ್ಲ್ಲಿಂ ದುಕಾಂ ಮುಖ್ಕಮಳಾರ್ ವೆಕ್ತ್ ಜಾಂವ್ಚಿ ತಿ ಭಿರಾಂತ್... ದೆವಾ ಮ್ಹಜ್ಯಾ, ಹಾಂವ್ ಕೆದಿಂಚ್ ವಿಸ್ರೊಂಚಿಂ ನಾಂ.
ಚೆಲ್ಸಿಯಾಯಿ ಮದೆಂ ಮದೆಂ ಹುಲೊಪಾನ್ ರಡ್ಣ್ಯಾಂಚೆ ಕಿಂಕ್ರಾಟ್ ಮಾರ್ತಾಲೆಂ. ತಾಂಣಿ ಎಕಾಮೆಕಾ ಪಳೆವ್ನ್ ರಡನಾಶೆಂ ದಾಕ್ತೆರಾಚ್ಯಾ ಹಿಶಾರ್ಯಾ ಪರ್ಮಾಣೆ ದೊಗಾಂಯ್ಕಿ ವಿವಿಂಗಡ್ ಕುಡಾಂನಿ ದಾಕಲ್ ಕೆಲೆಂ.
ದಾಕ್ತೆರ್ ಮ್ಹಣಾಲೊಕಿ, ಕುಡಿಭಿತರ್ ರಗತ್ ಘೆಟೆ ಜಾಯ್ನಾತ್ಲ್ಲೆಪರಿಂ ದೊನ್ಯಿ ಪಾಂಯಾಂಕ್ ತಿತೀನ್ ಕಡೆ ಚಿರ್ಲ್ಲೆ ಘಾಯ್ ಕರಿಜೆ ಪಡ್ತೆಲೆ. ನ್ಹಂಯ್ ತರ್ ಶಿರಾಂನಿ ರಗಾತ್ ಪಾಶಾರ್ ಜಾಯ್ನಾಶೆಂ ’ಗ್ಯಾಂಗ್ರಿನ್’ ಜಾಂವ್ಚಿ ಸಾದ್ಯತಾಯ್ ಆಸೊನ್ ದೊನ್ಯಿ ಪಾಂಯ್ ಕಾತ್ರುನ್ ಕಾಡ್ಚೆ ತಸಲೊ ಸಂದರ್ಬ್ ಯೆಂವ್ಕ್ ಪುರೊ. ಹಾಂವೆಂ ದಾಕ್ತೆರಾಕ್ ಸಾಂಗ್ಲೆಂ "ಕಿತೆಂ ಬರೆಂ ತೆಂ ಕರಾ". ತಾಣಿಂ ಮ್ಹಾಕಾ ಕುಡಾಂತ್ಲೆಂ ಭಾಯ್ರ್ ಧಾಡ್ಲೆಂ ಆನಿ ದಾರ್ ಧಾಂಪ್ಲೆಂ. ಹಾಂವ್ ಭಾಯ್ರ್ ಯೇವ್ನ್ ದಾರಾಲಾಗಿಂಚ್ ರಾವ್ಲಿಂ.
ಚೆಲ್ಸಿಯಾ ರಡೊಂಕ್ ಲಾಗ್ಲ್ಲೆಂಚ್ ಹಾಂವ್ ಧಾಂವ್ಲಿಂ...ಧಾಂವ್ಲಿಂ ಆನಿ ಧಾಂವ್ಲಿಂ. ತಾಚೆಂ ರಡ್ಣೆಂ ಮ್ಹಜ್ಯಾ ಕಾನಾಂಚ್ಯಾ ಫುಲಾಂಕ್ ಆಯ್ಕಾನಾತ್ಲ್ಲೆ ತಿತ್ಲೆ ಪಯ್ಸ್ ಧಾಂವ್ಲಿಂ. ಥಂಯ್ಸರ್ ಕಾಳೊಕಾಚ್ಯಾ ಜಾಗ್ಯಾರ್ ಬಸೊನ್ ಹಾಂವ್ ಚಿಂತುಂಕ್ ಪಡ್ಲಿಂ: ಬಿರ್ಮತ್ ತೆಂ ಧಾಕ್ಟುಲೆಂ ಭುರ್ಗೆಂ ಆಪ್ಣಾಚಿ ನ್ಹಯ್ ಆಸ್ಲ್ಲೆ ಚುಕಿಕ್ ತಿ ದೂಕ್ ಕಶಿ ಸೊಸುನ್ ವ್ಹರ್ತಾಸ್ತೆಲೆಂ? ಆನಿ ಹಾಂವ್... ಏಕ್ ಆವಯ್ ಜಾವ್ನ್ ಮ್ಹಜ್ಯಾ ರಗ್ತಾಮಾಸಾಚ್ಯಾ ಬಾಳಾಚ್ಯಾ ಕಶ್ಟ್ ಆನಿ ರಡ್ಣ್ಯಾಂ ಥಾವ್ನ್ ಪಯ್ಸ್ ಧಾಂವೊಂಕ್ ಪಳಯ್ತಾಂ? ಪಯ್ಸ್ ಧಾಂವೊನ್ ಯೇವ್ನ್ ಹ್ಯಾ ಕಾಳೊಕಾಂತ್ ಬಸ್ಲ್ಯಾಂ? ಮ್ಹಜ್ಯಾ ಭುರ್ಗ್ಯಾಚೆಂ ರಡ್ಣೆಂ ಮ್ಹಜ್ಯಾ ಕಾನಾಂಕ್ ಪಡನಾತ್ಲ್ಲೆಬರಿ?
ಹಾಂವೆಂ ದೊಳೆ ಧಾಂಪ್ಲೆ ಆನಿಂ ಮಾಗ್ಣೆಂ ಕೆಲೆಂ. ಜಶೆಂ ಮ್ಹಾಕಾ ಸ್ಪಿರಿತ್ ಲಾಬ್ಲ್ಲೆಪರಿಂ ಹಾಂವೆಂ ಮ್ಹಜೆಂ ಮನ್ ಘಟ್ ಕೆಲೆಂ. ಕಿತೆಂಯ್ ಜಾಂವ್ದಿ.. ಹಾಂವ್ ಮ್ಹಜೊ ಭರ್ವಸೊ ಆನಿ ಧಯ್ರ್ ಸಾಂಡ್ಚಿನಾಂ. ಮ್ಹಜ್ಯಾ ಕುಟ್ಮಾಕ್ ಭರ್ವಸ್ಯಾಚೊ ಘಟ್ ಖಾಂಬೊ ಜಾವ್ನ್ ಪಾಟಿಂಬೊ ದಿತೆಲಿಂ. ಹಾಂವ್ ಧಾಂವೊನ್ ಆಯಿಲ್ಲೆ ವಾಟೆನ್ಚ್ ಪಾಟಿಂ ಗೆಲಿಂ ಆನಿ ದಾಕ್ತೆರಾಕ್ ಭಾಯ್ರ್ ಆಪೊವ್ನ್ "ಚೆಲ್ಸಿಯಾಕ್ ವಾಂಚೊನ್ ಉರ್ಚೊ ಆವ್ಕಾಸ್ ಕಿತ್ಲೊ?" ಮ್ಹಣ್ ವಿಚಾರ್ಲೆಂ. ತೊ ಮ್ಹಣಾಲೊ -’ಹೆ ಪರಿಗತೆಂತ್ ಆಪ್ಣಾಕ್ ಕಿತೆಂಚ್ ಸಾಂಗೊಂಕ್ ಜಾಯ್ನಾ. ಕಿತ್ಯಾಕ್ ಮ್ಹಳ್ಯಾರ್ ಜಾಯ್ತೆಂ ರಗತ್ ಗೆಲಾಂ ಆನಿ ಕುಡಿಭಿತರ್ಲೆ ಜೀವ್ ರಕ್ಶಕ್ ದ್ರವ್ಯ್ ಕಿತೆಂಚ್ ನಾಂ ಜಾಲಾಂ. ಹೆಂ ಮನ್ಶಾಕ್ ಜೀವ್ ದವೊರ್ಚೆಂ ಜಾವ್ನಾಸಾ. ತೆಂ ತಾಚೆ ಕುಡಿ ಥಾವ್ನ್ ವ್ಹಾಳೊನ್ ವಚೊಂಕ್ ನಜೊ ಆಸ್ಲ್ಲೆಂ. ಪಾವ್ಣೆ ಪಾಂಚ್ ವರಾಂಚೆರ್ ಚೆಲ್ಸಿಯಾಚ್ಯಾ ಜಿವಾಕ್ ಅಪಾಯ್ ಆಸಾ ವಾ ನಾ ಮ್ಹಣ್ ಸಾಂಗ್ತಾಂ’ ಮ್ಹಣಾಲೊ. ಭರ್ತಿ ಪಾಂಚ್ ವರಾಂಚೆರ್ ತೊ ಭಾಯ್ರ್ ಆಯ್ಲೊ ಆನಿ ಮ್ಹಣಾಲೊ ಕಿ ಚೆಲ್ಸಿಯಾ ಆಪಾಯಾಂತ್ಲೆಂ ಚುಕ್ಲಾಂ. ಪೂಣ್, ತಾಕಾ ದಯ್ಹಿಕ್ ತಶೆಂ ಮಾನಸಿಕ್ ಥರಾನ್ ಸಂಪೂರ್ಣ್ ಗೂಣ್ ಜಾಂವ್ಕ್ ಜಾಯ್ತೊ ಕಾಳ್ ಲಾಗ್ತಲೊ.
ತ್ಯಾ ದಿಸಾ, ಸಗ್ಳಿ ರಾತ್ ಹಾಂವ್ ಆಸ್ಪತ್ರೆಂತ್ ಆಸ್ಲ್ಲಿಂ. ಡೆವಿಡ್ ಘರಾ ಎಕ್ಲೊಚ್ ಆಸ್ಲ್ಲೊ. ಹಾಂವೆಂ ತಾಕಾ ಫೊನ್ ಕೆಲೆಂ. ತೊ ಸಗ್ಳೊಚ್ ಪಿಸಾಂತುರ್ ತಶೆಂ ಜಾಲ್ಲೊ. ಧಯ್ರ್ ಘೆಂವ್ಕ್ ಹಾಂವೆಂ ತಾಕಾ ಭುಜಾವಣ್ ದಿಲಿ. ತೊ ಭುರ್ಗ್ಯಾಂಚೊ ಇತ್ಲೊ ಮೋಗ್ ಕರ್ತಾಲೊಕಿ, ದೆದೆಸ್ಪರ್ ಜಾವ್ನ್ ಕಿತೆಂ ತರ್ಯಿ ಅನಾಹುತ್ ಕರುನ್ ಘೆತ್ ಮ್ಹಳ್ಳೆಂ ಭೆಂ ಮ್ಹಾಕಾ ಲಾಗ್ಲ್ಲೆಂ. ತಶೆಂ ಹಾಂವೆಂ ಮರ್ವಿನಾಕ್ ಆನಿ ಶಬಿತಾಕ್ ಘರಾ ವಚೊನ್ ಡೆವಿಡಾಸಂಗಿಂ ರಾವೊಂಕ್ ಫೊನ್ ಕರುನ್ ಸಾಂಗ್ಲೆಂ.
ಸಕಾಳಿಂ ಫುಡೆಂ ತಿಂ ಆಸ್ಪತ್ರೆಕ್ ಆಯ್ಲಿಂ. ಚೆಲ್ಸಿಯಾಕ್ ಪಳೆವ್ನ್ ರಡ್ಲಿಂ. ತಾಚೊ ಹರ್ದ್ಯಾ ಜಾಗೊ ತಶೆಂ ಖಾಕೆಂತ್ ಸಮೆತ್ ಹುಲ್ಪಲ್ಲ್ಯಾನ್ ತಾಕಾ ’ಹಾರ್ಟ್ ಮೊನಿಟ್ರಾ’ಚೆರ್ ದವರ್ಲ್ಲೆಂ. ತಾಚಿ ಕಾಳ್ಜಾದಾಬ್ ಚಡುಣೆಂ ಜಾಂವ್ಚೆಂ ದಿಸ್ತಾಲೆಂ. ತೆದ್ನಾಂ ಹಾಂವೆಂ ಚಿಂತ್ಲೆಂ ಕಿ ಚೆಲ್ಸಿಯಾ ಆಮ್ಚೆ ಥಾವ್ನ್ ಪಯ್ಸ್ ಜಾತೆಲೆಂ. ದೆವಾಲಾಗಿಂ ಹಾಂವೆಂ ಕಶೆಂ ಆನಿ ಕಿತ್ಲೆಂ ಮಾಗ್ಲೆಂ ಆನಿ ತಿ ರಾತ್ ಮೌನತೆನ್ ಹಾಂವೆಂ ಕಶಿ ಪಾಶಾರ್ ಕೆಲ್ಲಿ ಮ್ಹಣ್ ಮ್ಹಾಕಾ ಮತ್ ಕಳಿತ್.
ಚೆಲ್ಸಿಯಾಚಿ ತ್ಯಾ ವೆಳಾಚಿ ಭಲಾಯ್ಕಿ ಭಾರಿಚ್ ಅಸ್ಥಿರ್ ಭೊಗ್ತಾಲಿ. ದಾಕ್ತೆರ್ ಮ್ಹಣಾಲೊ :"ಹ್ಯಾ ಲ್ಹಾನ್ಶ್ಯಾ ಭುರ್ಗ್ಯಾ ಥಾವ್ನ್ ಹಿ ವ್ಹಡ್ ದೂಕ್ ಸೊಸುನ್ ವ್ಹರುಂಕ್ ಸಾದ್ಯ್ ಜಾಂವ್ಚೆಂನಾ ಆನಿ ತೆಂ ತವಳ್ ತವಳ್ ಥೊಡ್ಯಾ ಮಾಪಾಕ್ ಮತಿಹೀನ್ ಸ್ಥಿತೆಕ್ ಪಾವ್ತೆಲೆಂ. ಸಕಾಳಿಂ ತಾಕಾ ತಾಪ್ ಸುರು ಜಾಲ್ಲೊ ಆನಿ ದೋನ್ ಹಪ್ತೆಭರ್ ಆಸ್ಲ್ಲೊ. ಹರ್ಎಕಾ ದಿಸಾ ತಶೆಂ ತಾಕಾ ರಗತ್ ಆನಿ ಜೀವ್ರಕ್ಶಕ್ ದ್ರವ್ಯ್ ದೀಂವ್ಕ್ ಆಸ್ಲ್ಲೆಂ. ಹ್ಯಾ ಧಕ್ಯಾಕ್ ಲಾಗೊನ್ ತಾಚೆವರ್ವಿಂ ಪೊಟಾಕ್ ಕಾಂಯ್ ಖಾಂವ್ಕ್ ಜಾಯ್ನಾತ್ಲ್ಲೆಂ. ಫಕತ್ ದ್ರವ್ಯ್ ಖಾಣ್ಮಾತ್ ವೆತಾಲೆಂ ಜಾಲ್ಲ್ಯಾನ್ ತಾಚಿ ಜಡಾಯ್ ತೀವ್ರ್ ಥರಾನ್ ದೆಂವೊಂಕ್ ಲಾಗ್ಲಿ. ಆಸ್ಪತ್ರೆಕ್ ದಾಕಲ್ ಕರ್ತಾನಾ ಚೊವ್ದಾ ಕಿಲೊ ಆಸ್ಲ್ಲಿ ತಾಚಿ ಜಡಾಯ್ ದೋನ್ ಹಪ್ಯ್ತಾಭಿತರ್ ಧಾ ಕಿಲ್ಯಾಕ್ ಯೇವ್ನ್ ರಾವ್ಲ್ಲಿ. ತಾಚೆ ಉಪ್ರಾಂತ್ ದಾಕ್ತೆರಾಂನಿ ತಾಕಾ ಖಾಣಾನಳಿ ಘಾಲಿ. ತಾಕಾ ಪಳೆವ್ನ್ ಹಾಂವ್ ದೆದೆಸ್ಪರ್ ಜಾವ್ನ್ ಆಸ್ಲ್ಲಿಂ - ಎದೊಳ್ಚ್ ತಾಕಾ ಮುತಾನಳಿಯಿ ಘಾಲ್ಲಿ. ದೊನ್ಯಿ ಹಾತಾಂಕ್ ರಗತ್ ಆನಿ ಜೀವ್ ರಕ್ಶಕ್ ದ್ರವ್ಯಾಚ್ಯಾ ನಳಿಯಾಂಚ್ಯೊ ಸುವ್ಯೊ ತೊಪ್ಲ್ಲ್ಯೊ. ತಶೆಂಚ್ ತೀನ್ ವೊರಾಂಕ್ ಏಕ್ ಪಾವ್ಟಿಂ ತಾಚೆ ಕುಡಿಥಾವ್ನ್ ’ಹಿಮೊಗ್ಲೊಬಿನಾ’ಚೊ ಪ್ರಮಾಣ್ ಪರಿಕ್ಶಾ ಕರ್ಚೆ ಖಾತಿರ್ ರಗತ್ ಕಾಡ್ತಾಲಿಂ. ದುಕಿವರ್ವಿಂ ತಾಚೆ ದೊನ್ಯಿ ಹಾತ್ ಸುಜ್ಲ್ಲೆ. ಪಾಂಯಾಂಕ್ ಬೆಂಡೆಜ್ ಕರ್ತಾನಾ ವಿಪ್ರೀತ್ ರಡ್ತಾಲೆಂ. ಸ್ಥಿರ್ ರಾವೊಂಕ್ ತೆಂ ಪ್ರೇತನ್ ಕರ್ತಾಲೆಂ ತರ್ಯಿ ಬೆಂಡೆಜ್ ಕರ್ತಾನಾ ತಿ ದೂಕ್ ತಾಕಾ ಕಳಿತ್ ಜಾತಾಲಿ. ಥೊಡೆಪಾವ್ಟಿಂ ತಾಚಿ ರಗ್ತಾನಳ್ ಫುಟ್ತಾಲಿ ಆನಿ ರಗತ್ ವ್ಹಾಳ್ತಾಲೆಂ. ಎಕೆಕ್ಪಾವ್ಟಿಂ ನಿದ್ಲ್ಲೆ ಕಡೆನ್ ತೆಂ ಜ್ಯೊರಾನ್ ಕಾಂಪ್ತಾಲೆಂ ಆನಿ ಖಟ್ಲ್ಯಾಥಾವ್ನ್ ಸಕ್ಲಾ ದೆಂವೊಂಕ್ ಪ್ರೇತನ್ ಕರ್ತಾಲೆಂ. ನರ್ಸಾಂ ಮ್ಹಣ್ತಾಲಿಂ -’ಮಾನಸಿಕ್ ಜಾವ್ನ್ ತೆಂ ಆನಿಕ್ಯಿ ತ್ಯಾ ಅನ್ವಾರಾಥಾವ್ನ್ ಭಾಯ್ರ್ ಯೆಂವ್ಕ್ ನಾ. ಆಪುಣ್ ಅನಿಕ್ಯಿ ಹುನ್ ಉದ್ಕಾಚ್ಯಾ ’ಬಾತ್ ಟಬ್ಬಾಂ’ತ್ ಆಸಾಂ ತಶೆಂ ಚಿಂತಾ ಆನಿ ಭಾಯ್ರ್ ಯೆಂವ್ಕ್ ಪ್ರೇತನ್ ಕರ್ತಾ.’
ತ್ಯಾ ದೀಸ್ ಕಿತೆಂ ಘ್ಡ್ಲ್ಲೆಂ ಮ್ಹಣ್ ಆಮ್ಕಾಂ ಸಾರ್ಕೆಂ ಕಳಿತ್ ನಾ. ಕಾಮಾಚ್ಯಾ ಚೆಡ್ವಾಲಾಗಿಂ ಆಮಿ ಎದೊಳ್ ವಿಚಾರುಂಕ್ ನಾ. ದಾಕ್ತೆರಾನ್ ವಿಚಾರ್ಲ್ಲ್ಯಾಕ್ ತೆಂ ಮ್ಹಣಾಲೆಂ ಕಿ, ’ಹುನ್ ಚ್ಹಾಯೆಚೆಂ ಆಯ್ದಾನ್ ಪಡ್ಲೆಂ’. ದಾಕ್ತೆರ್ ಮ್ಹಣಾಲೊ -ಹೆಂ ಸಾದ್ಯ್ಚ್ ನಾ ಹುನ್ ಚಾಯೆಚೆಂ ಆಯ್ದಾನ್ ಪಡ್ಲ್ಯಾರ್ಯಿ ಗುಪಿತ್ ವಿಸ್ವೆ ಹುಲ್ಪೊನ್ ವೆಚ್ಯಾ ತಸಲೆ ತಿಸ್ರ್ಯಾ ಮಾಪಾಚೆ ಹುಲ್ಪವ್ಣ್ಯಾಚೆ ಘಾಯ್ ಜಾಂವ್ಕ್ ಸಾದ್ಯ್ಚ್ ನಾ. ಉಪ್ರಾಂತ್ ಮ್ಹಣಾಲೆಂ ’ದೊಗಾಂಯ್ ಭುರ್ಗ್ಯಾಂಕ್ ನ್ಹಾಣ್ ಕರಂವ್ಚೆ ಖಾತಿರ್ ಉದ್ಕಾಚ್ಯಾ ಟಬ್ಬಾಂತ್ ದವರುನ್ ಬಾಲ್ಕನಿಕ್ ತುವಾಲೊ ಹಾಡುಂಕ್ ಗೆಲ್ಲಿಂ. ವೆತಾನಾ ಫರಾಮಶೆನ್ ಥಂಡ್ ಉದ್ಕಾಚ್ಯಾ ನಳಾ ಬದ್ಲಾಕ್ ಹುನ್ ಉದ್ಕಾಚೊ ನಳ್ ’ಬಾತ್ಟಬ್ಬಾ’ಕ್ ಸೊಡ್ಲ್ಲೊ. ಫಕತ್ ಎಕಾಚ್ ಮಿನುಟಾಚ್ಯಾ ವೆಳಾಕ್ ಗೆಲ್ಲಿಂ’. ದಾಕ್ತೆರ್ ಮ್ಹಣಾಲೊ - ’ತೆಂ ಫಟ್ ಸಾಂಗೊನ್ ಆಸಾ’. ಲೆಬೊರೆಟರಿ ರಿಪೊರ್ಟಾ ಪ್ರಕಾರ್ ಚೆಲ್ಸಿಯಾ ಸುಮಾರ್ ಅರ್ದ್ಯಾವೊರಾಪ್ರಾಸ್ ಚಡಿತ್ ವೆಳಾ ಪರ್ಯಾಂತ್ ಖತ್ಕತ್ಯಾ ಹುನ್ ಉದ್ಕಾಂತ್ ಆಸ್ಲ್ಲೆಂ. ಇತ್ಲೆ ಗೂಂಡ್ ಹುಲ್ಪಾಲ್ಲೆ ಘಾಯ್ ಜಾಲ್ಲೆ ಕಿ ತಾಚ್ಯಾ ಪಾಂಯಾಂ ಪಂದ್ಲಿ ದಾಟ್ ಕಾತ್ ಸಮೇತ್ ಹುಲ್ಪೊನ್ ನಿಸ್ರೊನ್ ಗೆಲ್ಲಿ. ಏಕ್ ಇಂಚ್ ಗುಂಡಾಯೆಕ್ ಮ್ಹಣಾಸರ್ ಪಾಂಯಾಂಚೆಂ ಮಾಸ್ ಉಕ್ಡೊನ್ ಕಾತ್ ಹುಲ್ಪೊನ್ ನಿಸ್ರೊನ್ ವಚೊನ್ ರಗ್ತಾಶಿರೊ ಭಾಯ್ರ್ ದಿಸ್ತಾಲ್ಯೊ. ನಾಕ್ಶೊ ಸಮೇತ್ ಬೊಟಾಂಥಾವ್ನ್ ವೆಗ್ಳ್ಯೊ ಜಾವ್ನ್ ಗೆಲ್ಲ್ಯೊ.
ಕಾಮಾಚ್ಯಾ ಚೆಡ್ವಾನ್ ತಾಂಕಾಂ ಸಾಂಜೆಚ್ಯಾ ಸುಮಾರ್ ಸ ವೊರಾರ್ಶೆಂ ಹುಲ್ಪಾಯ್ಲಾಂ ತರ್ಯಿ ತಾಣೆ ಮ್ಹಜ್ಯಾ ದಫ್ತರಾಕ್ ಫೊನ್ ಕರುನ್ ಸಾಂಗೊಂಕ್ ನಾ. ಥೊಡಿ ತಕ್ಲಿ ವಾಪಾರುನ್ ಥಂಡ್ ಉದಾಕ್ ಭುರ್ಗ್ಯಾಂಚ್ಯಾ ಆಂಗಾರ್ ವೊತ್ಚೆಂ ಸೊಡುನ್ ಕಾಂಬೊಳ್ ಘೆವ್ನ್ ದೊಗಾಂಯ್ಕಿ ವಯ್ರ್ ಥಾವ್ನ್ ಸಕ್ಲಾ ಮ್ಹಣಾಸರ್ ಪುಸ್ಲಾಂ. ತಶೆಂ ಚೆಲ್ಸಿಯಾಚೆಂ ಪೋಟ್, ಪೆಂಕಡ್, ಜಾಂಗ್ಳಾಂ, ಧೊಂಪರ್ ಆನಿ ಪಾಂಯಾಂಚೆ ನಾಕ್ಶೆ ಮ್ಹಣಾಸರ್ ಪುಸ್ಲ್ಲ್ಯಾನ್ ಕಾತ್ ವೆಗ್ಳಿ ಜಾವ್ನ್ ಮಾಸ್ ಭಾಯ್ರ್ ಆಯ್ಲಾಂ. ತಾಚಿ ಧೊಂಪ್ರಾಗಾಂಟ್ ಆನಿ ಪಾಂಯಾಂಚಿಂ ಹಾಡಾಂ ಸಮೆತ್ ದೊಳ್ಯಾಂಕ್ ದಿಸ್ತಾಲಿಂ. ಇತ್ಲೆಂ ಸಕಡ್ ಜಾಲ್ಯಾರ್ಯಿ ಮ್ಹಾಕಾ ಕಳಿತ್ ಜಾಲ್ಲೆಂ ಸುಮಾರ್ ಸಾಡೆ-ಆಟ್ ವೊರಾಂ ಉಪ್ರಾಂತ್ ಹಾಂವ್ ದಫ್ತರಾಥಾವ್ನ್ ಘರಾ ಯೇವ್ನ್ ಪಾವ್ಲ್ಲ್ಯಾ ತೆದ್ನಾಂ.
ವಿಶೇಸ್ ಕಿತೆಂಗಿ ಮ್ಹಳ್ಯಾರ್ ಮೆರಿನ್ ಭುರ್ಗ್ಯಾಂಕ್ ಕೆದ್ನಾಂಯ್ ನ್ಹಾಣ್ ಕರಯಿಲ್ಲೆಂ ನಾ. ಮ್ಹಕಾ ಹೆಂ ಕಳಿತ್ ಜಾಯ್ನಾಂ ಕಿ ತ್ಯಾ ದಿಸಾ ತೆಂ ಭುರ್ಗ್ಯಾಂಕ್ ನ್ಹಾಣಂವ್ಕ್ ಕಿತ್ಯಾಕ್ ಗೆಲ್ಲೆಂ? ಆಮಿ ಚಿಂತ್ಚೆಂ ಕಿತೆಂಗಿ ಮ್ಹಳ್ಯಾರ್ ತ್ಯಾ ದೀಸ್ ತಾಣೆಂ ತಾಚ್ಯಾ ಇಶ್ಟಾಗತೆಚ್ಯಾ ಚಲ್ಯಾಕ್ ಘರಾ ಆಪವ್ನ್ ಹಾಡ್ಲಾಂ ಆನಿ ಭುರ್ಗ್ಯಾಂಥಾವ್ನ್ ಮೊಗಾಸಯ್ಲಾಪಾಕ್ ಕರಂದಾಯ್, ಉಪದ್ರ್ ಜಾಯ್ನಾಶೆಂ ಭುರ್ಗ್ಯಾಂಕ್ ನ್ಹಾಣ್ಯೆಕ್ ವ್ಹರುನ್ ನ್ಹಾಂವ್ಚ್ಯಾ ಉದ್ಕಾಚ್ಯಾ ಟಬ್ಬಾಂತ್ ಉದ್ಕಾಂತ್ ಖೆಳೊಂಕ್ ಸೊಡ್ಲ್ಲೆಂ. ಅಮ್ಸೊರಾನ್ ಆನಿ ಗಡ್ಬಡೆನ್ ತಾಣೆ ಹುನ್ ಉದ್ಕಾಚೊ ನಳ್ ಚಾಲು ಕರುನ್ ನ್ಹಾಣ್ಯೆಚೆಂ ದಾರ್ ಖಿಳ್ ಘಾಲುನ್ ಬಂದ್ ಕೆಲಾಂ. ತಾಕಾ ಹೆಂ ವಿಸ್ರಾಲ್ಲೆಂ ಕಿ, ಉದಕ್ ಹುನ್ ಕರ್ಚೆಂ ’ಹೀಟರ್’ ತಾಣೆ ಚಾರ್ ವೊರಾಂ ಚಾಲು ದವರ್ಲ್ಲೆಂ. ಆಮ್ಕಾಂ ಹೆಂ ಸಮ್ಜಾನಾಂಕಿ ಅಪಾಪ್ಲೊ ಜೀವ್ ವಾಂಚಂವ್ಕ್ ಹಾಕ್ಬೋಬ್ ಮಾರುನ್ ರಡ್ಚ್ಯಾ ಭುರ್ಗ್ಯಾಂಚೆಂ ರಡ್ಣೆಂ ತಾಕಾ ಕಿತ್ಯಾಕ್ ಆಯ್ಕೊಂಕ್ನಾಂ? ಕಾಂಯ್ ದೊಗಾಂಯ್ನಿ ಕುಡಾಭಿತರ್ ಎಕ್ಸುರ್ಪಣಾಂತ್ ಮೊಗಾಖೆಳ್ ಖೆಳ್ತಾನಾ ಕುಡಾಚೆಂ ದಾರ್ ಬಂದ್ ಕೆಲ್ಲೆಂ ಕೊಣ್ಣಾ?
ತ್ಯಾ ಖತ್ಕತ್ಯಾ ಹುನ್ ಉದ್ಕಾಂತ್ ಅರ್ದೆಂ ವೋರ್ ಮ್ಹಣಾಸರ್ ತಾಪ್ತಾನಾ, ಹುಲ್ಪತಾನಾ ಚೆಲ್ಸಿಯಾನ್ ಕಾಂಯ್ ಕಿತ್ಲೆಂ ಅಕ್ಲಾಸಾಚೆಂ ರಡ್ಣೆಂ ಕೆಲ್ಲೆಂ ಕೊಣ್ಣಾ? ಡಿಯೆಂಡ್ರಾ ’ಬಾತ್ ಟಬ್ಬಾಂ’ತ್ಲೆಂ ಪಯ್ಲೆಂ ಭಾಯ್ರ್ ಉಡ್ಲ್ಲ್ಯಾನ್ ತಾಕಾ ಚೆಲ್ಸಿಯಾಕ್ ಜಾಲ್ಲ್ಯಾ ತಿತ್ಲೆ ಘಾಯ್ ಜಾಂವ್ಕ್ ನಾಂತ್. ತರಿಕ್ಯಿ ತಾಕಾ ಚಲೊಂಕ್ ತೀನ್ ಹಪ್ತೆ ಲಾಗ್ಲೆ. ತೆದೊಳ್ಪರ್ಯಾಂತ್ ಹಾತಾಪಾಯಾಂನಿ ಧರ್ಣಿರ್ ಕುಲೆ ವೊಡುನ್ ವೆತಾಲೆಂ. ಚೆಲ್ಸಿಯಾಕ್ ಚಲೊಂಕ್ ಯೆದೊಳ್ ಜಾಂವ್ಕ್ ನಾ. ಆನಿ ಕಿತ್ಲೆ ಮಹಿನೆ ಲಾಗ್ತಾತ್ ಕೊಣ್ಣಾ? ಆತಾಂ ತೆಂ ಧರ್ಣಿರ್ ಕುಲೆ ವೊಡುನ್ ಹೆವ್ಶಿನ್ ತೆವ್ಶಿನ್ ವೆತಾ. ತಾಕಾ ತಶೆಂ ದೆಖ್ತಾನಾ ಆಮ್ಕಾಂ ಮ್ಹಸ್ತು ಬೆಜಾರ್ ಜಾತಾ.ಹರ್ ಎಕ್ಲೊ/ಕ್ಲೆಂ ಸಾಂಗ್ತಾ ಕಿ ’ದೆವಾಕ್ ಅರ್ಗಾಂ, ಮಾಂದ್ರೆಕ್ ಶೆವ್ಟಾನಾಶೆಂ ಇತ್ಲೆಂ ಪುಣ್ಯಿ ಚಲನ್ ಆಸಾ ನ್ಹಂಯ್ಗಿ?’
ಆಮಿಂ ಆತಾಂ ’ಪೊಲಿಸ್ ಕೇಜ್’ ಅಕೆರ್ ಜಾಂವ್ಕ್ ರಾಕೊನ್ ಆಸಾಂವ್. ತಾಚ್ಯಾ ಉಪ್ರಾಂತ್ ಮೆರಿಚೊ ವಿಚಾರ್ ಕರ್ಚೊ ಮ್ಹಣ್ ಚಿಂತ್ಲಾಂ. ಫಕತ್ ತಾಣೆ ತಾಚಿ ತಕ್ಲಿ ವಾಪಾರುನ್ ಥಂಡ್ ಉದಾಕ್ ಭುರ್ಗ್ಯಾಚೆರ್ ವೊತ್ಲ್ಲೆಂ ತರ್ ಚೆಲ್ಸಿಯಾಕ್ ತಶೆಂ ಜಾತೆಂನಾ. ನವಿ ಕಾತ್ ಯೇವ್ನ್ ಆಸಾ ಜಾಲ್ಲ್ಯಾನ್ ಆನಿ ಥಂಯ್ ಹಾಂಗಾ ಚಿವ್ಳೊನ್ ವೋಡ್ನ್ ಧರ್ಲ್ಲೆ ಪರಿಂ ಜಾಲ್ಲ್ಯಾನ್ ತಾಕಾ ಚಲೊಂಕ್ ಸಾದ್ಯ್ ಜಾಯ್ನಾಂ. ತ್ಯಾ ದೆಕುನ್ ಹಾಂವ್ ತಾಕಾ ಸದಾಂ ’ಫಿಜಿಯೊಥೆರಾಪಿ’ ಕ್ಲಾಸಿಕ್ ವ್ಹರುನ್ ಆಸಾಂ. ಹಪ್ಯ್ತಾಕ್ ಏಕ್ ಪಾವ್ಟಿಂ ಆಸ್ಪತ್ರೆಕ್ ವಚೊಂಕ್ ಆಸಾ.
ರಗ್ತಾ ಶಿರೊ ಹುಲ್ಪೊನ್ ಮದೆಂ ಮದೆಂ ಕುಡ್ಕೆ ಜಾಲ್ಲ್ಯಾನ್ ಚೆಲ್ಸಿಯಾಚ್ಯಾ ಪಾಂಯಾಂ ಥಾವ್ನ್ ತವಳ್ ತವಳ್ ರಗತ್ ಭಾಯ್ರ್ ಯೆತಾಲೆಂ. ಪಾಂಯಾಂ ಸುವಾತೆಚೆರ್ ಕಾತಿಚೆ ಜೀವ್ಕಣ್ ಸಂಪೂರ್ಣ್ ಹುಲ್ಪಲ್ಲ್ಯಾನ್ ಪಾಂಯಾಂಕ್ ನವಿ ಕಾತ್ ಯೆಂವ್ಚಿ ಸಾದ್ಯತಾಯ್ ನಾ ಖಂಯ್. ತಶೆಂ ಕಾತ್ ಬದ್ಲಾವಣ್ ಕರ್ಚೆಂ ಗರ್ಜೆಚೆಂ. ಹುಲ್ಪಲ್ಯಾ ಉಪ್ರಾಂತ್ ನವಿ ಆಯಿಲ್ಲಿ ಕುಲ್ಯಾಚಿ ಆನಿ ಜಾಂಗ್ಯಾಂಚಿ ಕಾತ್ ಕಾಡ್ನ್ ಪಾಂಯಾಂಕ್ ಬಸಯ್ಲಿ. ಆಜೂನ್ಯಿ ನ್ಹಾಣಿಯೆಕ್ ಆಪವ್ನ್ ವ್ಹರ್ತಾನಾ ತೆಂ ಭಿರಾತೆನ್ ರಡ್ತಾ. ’ಬಾತ್ ಟಬ್ಬಾ’ಕ್ ಪಳೆವ್ನ್ ಕಿಂಕ್ರಾಟ್ ಮಾರ್ತಾ. ತೆಗಾಂ ಮನ್ಶ್ಯಾಂನಿ ಧರ್ಲ್ಯಾರಿ ತಕಾ ಬೆಂಡೆಜ್ ಕರುಂಕ್ ಆಮ್ಕಾಂ ಕಶ್ಟ್ ಮಾರ್ತಾತ್. ತಿತ್ಲೆಂ ಉಚಾಂಬಳ್ ಜಾತಾ ತೆಂ. ಪಾಂಯ್ ಆಪ್ಡೂಂಕ್ ಸೊಡಿನಾ.
ವ್ಹಡ್ ಜಾತಾಣಾ ತಚೆ ಪಾಂಯ್ ಪಳೆಂವ್ಕ್ ಗಲೀಜ್ ದಿಸ್ತಾಲೆ ಮ್ಹಣ್ ಪಳಯಿಲ್ಲಿಂ ಸಾಂಗ್ತಾತ್. ಪೂಣ್ ಮ್ಹಾಕಾ ತಾಂಚಾ ಉತ್ರಾಂಚಿ ಪರ್ವಾ ನಾ. ಮ್ಹಜೆಂ ಭುರ್ಗೆಂ ಜೀವಂತ್ ಆಸಾ ಆನಿ ಹಾಂವ್ ಆಪ್ಡುನ್ ಧರುಂಕ್ ಸಕ್ತಾಂ ಮ್ಹುಳ್ಳಿ ಭುಜಾವಣ್ ಮ್ಹಾಕಾ. ತ್ಯಾ ದೀಸ್ ತೆಂ ಸುಲಬಾಯೆನ್ ಟಬ್ಬಾಂತ್ಲ್ಯಾ ಉದ್ಕಾಂತ್ ಬುಡೊನ್ ಮೊರ್ತೆಂ. ಹಾಂವೆಂ ಯೇವ್ನ್ ಪಳಯ್ತಾನಾ ಮುಕ್ಕಾಲ್ ವಾಂಟೊ ಉದಾಕ್ ಆಸ್ಲ್ಲೆಂ. ಸಾಬು, ಶಾಂಪು ಆನಿ ಖೆಳಾಚ್ಯೊ ವಸ್ತು ಪೂರಾ ಟಬ್ಬಾಂತ್ ಆಸ್ಲ್ಲ್ಯೊ. ಕಶೆಂ ಮ್ಹಳ್ಯಾರ್ ನಳಾಂತ್ಲ್ಯಾನ್ ಹುನ್ ಉದಾಕ್ ಟಬ್ಬಾಕ್ ಪಡ್ತಾನಾ ಚೆಲ್ಸಿಯಾ ಭಾಯ್ರ್ ಉಡೋಕ್ ವೊದ್ದಾಡ್ತಾಲೆಂ. ತಶೆಂ ಟಬ್ಬಾಚೆ ದೆಗೆನ್ ಆಸ್ಲ್ಲ್ಯೊ ಸರ್ವ್ ವಸ್ತು ತಾಣೆಂ ವೊಡುನ್ ಘಾಲ್ಲ್ಯೊ. ಹಾತ್ ಉಬಾರ್ನ್ ತಾಣೆಂ ಆಪ್ಣಾಕ್ ಭಾಯ್ರ್ ವೊಡುಂಕ್ ಡೆಯೆಂಡ್ರಾಲಾಗಿಂ ಪರತಿಲಾಂ ಆಸ್ತೆಲೆಂ. ಪೂಣ್ ತಾಚೆವರ್ವಿಂ ಸಾದ್ಯ್ ಜಾಂವ್ಕ್ ನಾ. ಕಿತ್ಯಾಕ್ ತೆಂಯೀ ಹುನ್ ಉದ್ಕಾಂತ್ ಹುಲ್ಪಾಲ್ಲೆಂ. ತಿತ್ಲೊ ವೇಳ್ ಮ್ಹಣಾಸರ್ ತಿ ದೂಕ್ ಆನಿ ಹುಲೊಪ್ ತಾಂಣಿ ಕಸೊ ಸೊಸುನ್ ವ್ಹೆಲೊ ಕೊಣ್ಣಾ? ಹೆಂ ಚಿಂತಾನಾ ಆಂಗ್ ಶಿರ್ಶಿರ್ತಾ.
ಆಸ್ಪತ್ರೆಚೆಂ ಬಿಲ್ಲ್ ಇಂಡಿಯಾಚೆ ಸುಮಾರ್ ಪಾವಣ್ಶೆಂ ಹಜಾರ್ ರುಪಯ್ ಜಾಲ್ಲೆ. ಪೂಣ್ ಆಮ್ಚಿ ಮಂಗ್ಳುರ್ಚಿ ಏಕ್ ನರ್ಸ್ ಆಸ್ಲ್ಲ್ಯಾನ್ ಚಾಳೀಸ್ ಹಜಾರಾಂಕ್ ಹಾಡುನ್ ರಾವಯ್ಲೆಂ. ತ್ಯಾ ನರ್ಸಾನ್ ಮ್ಹಾಕಾ ಭರ್ಪೂರ್ ಕುಮೊಕ್ ಕರುನ್ ಮಾನಸಿಕ್ ಥರಾನ್ ಧ್ರಡ್ ರಾವೊಂಕ್ ಭುಜಾವಣ್ ಆನಿ ಭರ್ವಸೊ ದಿಲ್ಲೊ.
ಘಾಯ್ ಸಾರ್ಕೆ ಗೂಣ್ ಜಾಂವ್ಕ್ ನಾತ್ಲ್ಲ್ಯಾನ್ ಚೆಲ್ಸಿಯಾಕ್ ಉಬೆಂ ರಾವೊನ್ ಚಲೊಂಕ್ ಸಾದ್ಯ್ ಜಾಯ್ನಾ. ಧರ್ಣಿರ್ ಕುಲೆ ವೊಡುನ್ ಹೆವ್ಶಿನ್-ತೆವ್ಶಿನ್ ವೆತಾ. ಹ್ಯಾ ವೆಳಾ ಮ್ಹಜ್ಯಾ ಪಾಂಯಾಂಮುಳಾ ಬಸೊನ್ ರಡೊನ್ ಆಸಾ.
ಜಾಯ್ತ್ ಬರೆಂ. ದೇವ್ ವ್ಹಡ್ ಜಾವ್ನಾಸಾ. ಆನಿ ಕಿತೆಂ ಆಸ್ಲ್ಯಾರ್ ಮುಕ್ಲ್ಯಾ ಕಾಗ್ದಾರ್ ಬರಯ್ತಾಂ. ತುಜೆ ಜಾಪಿಕ್ ರಾಕೊನ್ ರಾವ್ತಾಂ.
ಮೋಗ್ ಆಸೊಂದಿ
ಸುನಿತಾ.
"
"
Comments
Too good Naveen, Hatts OFF...
Your story on this weeks Rakhno was also good.
you are flagbearer of Kinnigoli